Што трэба зрабіць на дачы да пачатку сезона? Праверце, ці не забылі што-небудзь

У лютым, нават калі за акном снег і мароз, дачнікі пачынаюць актыўную падрыхтоўку да новага садова-агароднага сезона. За што бяромся ў першую чаргу і чым нам можа дапамагчы часнок з марганцоўкай – разбіраемся.

Вясна не за гарамі

У першую чаргу ўдзяліце ўвагу пладовым дрэвам. Абыдзіце ўвесь участак і праверце цэласнасць абвязкі ствалоў: лапкі, руберойд і спецыяльныя сеткі павінны шчыльна прылягаць да кары, не пакідаць зазораў для набегаў мышэй і зайцоў. Агледзьце маладыя саджанцы: у канцы зімы грызуны асабліва любяць паласавацца іх карой.

Калі пабелка са ствалоў дрэў змылася дажджом ці аблупілася, яе неабходна аднавіць. Але рабіць гэта трэба ў цёплы лютаўскі дзень пры тэмпературы вышэйшай за -5°C. Яна абароніць дрэвы ад сонечных апёкаў, якія вельмі небяспечныя пры рэзкіх перападах тэмпературы. Не лішнім будзе падгрэбсці снег да прыствольных кругоў, фарміруючы валікі вышынёй 50-70 см. Такім чынам вы створыце натуральнае ўкрыцце для каранёвай сістэмы і прадухіліце яе прамярзанне. Акрамя таго, забяспечыце добры запас вільгаці вясной.

Абрэзку саду лепш за ўсё запланаваць на той перыяд, калі тэмпература будзе вышэйшая за -10°C. Адрэжце ўсе пашкоджаныя, хворыя і засохлыя галіны, якія ў далейшым могуць стаць рассаднікам хвароб і шкоднікаў. Вострым секатарам выражце галіны з прыкметамі пачарнення, трэшчынамі або нарастамі. Пачынаць гэту важную працэдуру лепш за ўсё з яблынь і груш. Костачкавыя пароды (вішня, сліва, чарэшня) абразаем мінімальна, яны вельмі дрэнна пераносяць раны ў халодную пару года. Семечкавыя культуры фарміруем больш смела: прарэджваем крону і выразаем канкурыруючыя парасткі. Пасля завяршэння абрэзкі не забываем апрацаваць зрэзы садовым варам або спецыяльнай пастай. Гэта прадухіліць высушванне драўніны і пранікненне розных патагенаў.

Важны момант – барацьба з зімуючымі шкоднікамі. Развесьце ў садзе кармушкі для птушак на вышыні 1,5-2 м ад зямлі. Іх можна напоўніць несалёным салам, семкамі і зерневымі сумесямі. Птушкі дапамогуць знішчыць да 80% насякомых, якія схаваліся пад карой.

Таксама можна заняцца нарыхтоўкай чаранкоў для веснавых прышчэпак. Дрэвы ўсё яшчэ знаходзяцца ў стане глыбокага спакою. Для гэтага варта выбраць не вельмі марозны дзень, лепш у канцы месяца. Бяром секатар або спецыяльны нож, загадзя прадэзынфіцыраваныя, і пачынаем работу. Для чаранкавання падыходзіць здаровае дрэва ва ўзросце не больш за 10 гадоў, не закранутае шкоднікамі і хваробамі. Лепшы выбар – аднагадовыя прыросты таўшчынёй прыкладна з аловак, якія растуць з добра асветленага боку кроны. Акуратна наразаем чаранкі даўжынёй каля 30-40 см, на якіх знаходзіцца 3-7 добра бачных пупышак. Пакідаем іх да прышчэпкі ў холадзе, каб раней часу не прачнуліся. Аптымальная тэмпература – 0...+3°C, вільготнасць паветра – 85-90%. Калі ў якасці месца захоўвання выбралі халадзільнік, то чаранкі трэба загарнуць у вільготную тканіну і пакласці ў пакет. У падвале або склепе з нізкай тэмпературай і высокай вільготнасцю ставім іх вертыкальна ніжнімі зрэзамі ў вядро з вільготным пяском або ў пілавінне. Калі чаранкі сталі расці, то неабходна панізіць тэмпературу ці перасяліць іх у больш халоднае месца. Прышчэпліваць такія трэба самымі першымі.

Пералік інвентару

У канцы зімы не лішнім будзе правесці рэвізію садовага інвентару. Усё, што прыйшло ў непрыдатнасць, замяняем або рамантуем. Важна таксама зняць іржу з інструменту. Калі яе шмат, дапамогуць спецыяльныя саставы. Агледзьце граблі і матыкі: пры неабходнасці выраўнуйце іх зубцы.

Невялікія інструменты трэба якасна пачысціць і высушыць. Гэта датычыцца кустарэзаў, секатараў, садовых нажніц. Пасля на ўсе рассоўныя механізмы наносім спецыяльную змазку.

Звярніце ўвагу таксама і на драўляныя ручкі інструменту. У час зімовага захоўвання яны маглі папсавацца ад грыбка, патрэскацца або дэфармавацца. Дробныя пашкоджанні можна зняць пры дапамозе наждачнай паперы. А тыя, што зусім прыйшлі ў непрыдатнасць, лепш замяніць на новыя.

Увага – цяпліцы

Перш за ўсё цяпліцу трэба агледзець і адрамантаваць. Прыбіранне ўнутры звычайна праводзяць яшчэ восенню. Але калі па нейкіх прычынах вы гэтага не зрабілі, пачынайце работу, як толькі спадуць маразы. Выносім усе рэшткі раслін, падвязачны матэрыял і апорныя калкі. Ацэньваем стан абшыўкі і каркаса. Цяпліцы звычайна абшываюць шклом, пластыкавай плёнкай або полікарбанатам. Горш за ўсіх зіму пераносіць плёнка. Яе лепш замяніць на новую. На шкле і полікарбанаце могуць з'явіцца расколіны. Не пакідайце пашкоджанні з думкай, што яны яшчэ «пастаяць». Пры моцным ветры або перападах тэмпературы частка збудавання можа цалкам разбурыцца і рамонт усё роўна спатрэбіцца.

Далей прамываем і дэзынфіцыруем цяпліцу знутры. Перад гэтым пажадана накрыць глебу поліэтыленам, каб сродкі на яе не трапілі. Абшыўку знутры старанна прамываем растворам гаспадарчага мыла. У раствор для апрацоўкі полікарбанату дабаўляем марганцоўку. Драўляныя рамы мыем чыстай вадой, металічныя – слабым воцатным растворам.

Чыстую цяпліцу добра прасушваем і толькі пасля гэтага пачынаем наступны этап – дэзынфекцыю. Ён вельмі важны, паколькі ўнутры збіраецца вялікая колькасць бактэрый, якія актыўна размнажаюцца і без апрацоўкі хутка знішчаць усе вашы пасадкі.

Самы хуткі спосаб аховы ад інфекцый і насякомых – хімічныя сродкі. Найбольш распаўсюджаныя: борная кіслата, «Белізна», серныя і тытунёвыя шашкі, прэпарат «Біяпаг», хлорная вапна. Дарэчы, для кожнага матэрыялу падыдзе свой спосаб, галоўнае – дакладна прытрымлівацца інструкцыі.

Калі ж вырашылі звярнуцца да народных сродкаў, то настой з часнаком і марганцоўкай будуць як мага дарэчы. Рэцэпт просты: разводзім у 10-літровым вядры вады марганцоўку да малінавага колеру, дабаўляем 1,5-2 шклянкі здробленага ў блэндары або нацёртага часнаку. Апырскваем паверхню ім адразу ж пасля падрыхтоўкі. Яшчэ адзін спосаб – іглічны адвар. Заліваем вадой паўвядра хваёвых галінак, праварваем 20 хвілін або настойваем двое сутак. Затым апрацоўваем цяпліцу.

Калі крона дрэў і кустоў загушчана, самы час пазбавіцца ад лішніх галін, абрэзаўшы іх садовымі нажніцамі або пілой. Толькі зрабіць гэта трэба да таго моманту, пакуль не пачнуць распускацца пупышкі.


| Святлана Гайдук, часопіс «7 дней».